VENRES, 15 DE MAIO: REPASO (DIALECTOLOXÍA). TEXTO. MORFOLOXÍA (INDEFINIDOS, RELATIVOS, EXCLAMATIVOS E INTERROGATIVOS. PRONOME PERSOAL).

Bos días.

1. Repaso de Lingua e Gramática:  Variedades dialectais.

• Titorial de repaso Variedades dialectais, feito sobre os apuntamentos de Dialectoloxía (tamén na aula virtual).

• Como afrontaron esta cuestión nas ABAU? Cuestión 4, xullo, 2019, opción A:

4. A palabra rincós (verso 10) amosa un fenómeno dialectal que caracteriza un dos bloques dialectais do galego. Cal é ese fenómeno? Que bloque dialectal caracteriza? Sinala outros dous fenómenos característicos dese bloque. [1 punto] 

2. Texto:

• Opción 1: "Unha vacina para o planeta". 
• Opción 2: "Medo". 
• Opción 3: Redacción/Comentario crítico sobre o que aparece nesta viñeta de Luis Davila.

 

Redacción sobre o tema central ou comentario crítico.

A semana que vén practicaremos máis sobre o esquema, intencionalidade, resumo, tema, etc.

3. Morfoloxía: Indefinidos, relativos, exclamativos e interrogativos. Pronome persoal.

• Solución ás actividades: Indefinido (páx. 76, as 10 primeiras); relativo (páx. 79: exercicio 1 (10 primeiras), exercicio 2 (3 primeiros textos) nesta ubicación.

• Pronome persoal. PP. 11-15 de Morfoloxía-Teoría. Escoitade estes titoriais: Pronome persoal 1 e Pronome persoal 2 (Interferencias lingüísticas). Despois, contestade estas cuestións:
  1. Podes localizar nun texto os pronomes persoais tónicos e átonos e determinar a súa función sintáctica?
  2. Cales son os valores especiais de nós?
  3. Que preposicións contraen co pronome tónico el, ela, eles, elas?
  4. Pronominalización. Tes que reparar na diferenza te/che, llo/llelo... (Explicado máis abaixo).
  5. Que función teñen que cumplir os reflexivos en galego?
  6. Que tipos hai de verbos pronominais?
  7. Cales son os valores de se en galego?
  8. Como podes recoñecer un dativo de solidariedade? Ten función sintáctica? 
  9. Como podes recoñecer un dativo de interese? Ten función sintáctica?
  10. Fai un cadro coas contraccións entre as formas átonas do pronome. 
  11. Cal é a forma normal de colocación do pronome? En que ocasións vai anteposto ao verbo? (NIANIEO).
  12. É aceptable en galego "elo"? A que se debe ese mal uso?
  13. É aceptable en galego "É máis alta ca eu"? Por que?
  14. Como podes saber que un pronome "sobra" nunha construción? Isto é, a construción é correcta sen ese pronome e incorrecta co pronome.

  
  Punto 4. Diferenza te/che.
  
  
  A forma te é de CD; che de CI. Unha maneira doada de saber se hai que usar te/che é a que segue.
  
  
  "Deixoute na casa" ou "Deixouche na casa"?
  1. Pasa a oración a 3ª persoa: Deixouno na casa / Deixoulle na casa. Obviamente, o correcto é o primeiro: deixouno.
  2. Fai a seguinte correspondencia: se entra o, é te; se entra lle, é che; se entra se é te. Dito doutro xeito: pasa a oración a o-lle-se (nesta orde). O-TE, LLE-CHE, SE-TE.
  
  Punto 4. Llo/llos/llelo/llelos.
  
  
  Recorda as contraccións. Deixoulle o libro: Deixoullo. Deixoulles os libros: Deixoullelos (lles+os).
  
  Na próxima sesión, achegarei as solucións ao cuestionario-teoría do pronome persoal e marcarei actividades.

O próximo día, solución ao cuestionario-teoría do pronome persoal. Marcarei actividades. De repaso de Lingua e Gramática, seguiremos con Segmentación, documento base dos titoriais Segmentación I e Segmentación II, coas correspondentes actividades que saíron nos exames das ABAU (neste enlace). 

Hoxe temos videoconferencia ás 11.20.

Vémonos.